Happy 2nd Birthday~

囡囡今日2歲喇!
媽媽祝你日日都開開心心~
無病無痛~ 食得玩得瞓得~



今日囡囡終於肯唱生日歌, 又扮許願, 仲肯吹蠟燭添!
總算無白費我之前日日教佢! 叻女!



表姐結他伴奏, 囡囡跳勁舞, 仲有錢俾! 好好笑!



姨媽煲左靚魚湯, 睇下囡囡飲到個樣幾冧~

囡囡~
因為有你, 屋企多左好多笑聲,
大家都好開心呀~

口水妹

囡囡而家好多野講, 除左瞓覺, 把口無停過, 吾係食野就係講野, 咩都要理, 咩都關佢事...

有晚媽媽俾爸爸睇相, 阿女即刻衝埋黎講:「睇下...我又睇下...一齊睇吖!」

囡囡:「囡囡...女仔, 媽媽...女仔, 爸爸...男仔, 嫲嫲...女仔, 咁豬豬呢?」
媽媽:「豬豬係公仔!」
囡囡:「呢個呢?」
媽媽:「呢個係枕頭,吾係人黎架喎!」
囡囡:「吓...」

囡囡玩緊ipod...
媽媽:「囡囡你d頭髮好長喎!」
囡囡:「咁未剪囉...」
媽媽:「@.@...叫邊個剪呀?」
囡囡好求其咁答:「爸爸囉!」
掛住玩, 完全吾想理我...

沖完涼一開門, 囡囡好多時都會9秒9走埋黎:「媽媽沖完涼喇! 濕濕呀你! 抺頭啦! 冷親呀!」

有日佢掩住個咀衝埋黎:「好臭呀!! 爸爸錫錫...好臭呀!」
又會指住爸爸d衫話:「爸爸架...好臭唷!」
今晚又自言先語講:「囡囡香香...媽媽香香...爸爸臭臭呀!」
乜爸爸真係好臭咩? 哈哈~

早晨

每朝瞓醒, 阿女都會即刻對住我笑~
有時仲會好嗲咁叫我:「媽媽~」

呢個習慣真係好好, 笑住去迎接一日既新開始,
好有希望呀!

吾知關吾關胎教事呢?
果時我日日都會同阿女講你要笑多d, 開心d,
吾好成日喊呀!
可能囡囡真係聽到~

天空

囡囡好鍾意望天空,
閒時悶悶地會搬張櫈仔坐係門口睇!

朝早瞓醒
囡囡:「睇下! 好天呀! 太陽伯伯...好靚呀!」
媽媽問:「有無雲先? 」
囡囡:「有呀! 行...行..行.. bye bye!」
媽媽又問:「天空咩色架? 」
囡囡:「吓...紅色...」
媽媽笑:「藍色呀! 傻豬!」
囡囡細細聲答:「藍色...」

但係一落雨, 佢就會好緊張,
重覆咁講:「落雨呀! 擔摭喇! 濕哂呀! 抹抹! 慘喇!」

夜晚又會望個天, 大叫:「睇下,月亮呀!」
媽媽:「係喎! 月亮喎!」
囡囡:「好靚呀! Hello!」
媽媽:「睇下果度, 有星星呀!」
囡囡係咁望:「吓...無喎!」
媽媽:「呢...果度呢!」
囡囡搵到之後大叫:「係呀! 好靚呀! 閃閃閃!」

囡囡, 其實媽媽都好鍾意望天空架!^^

收衫

今晚囡囡第一次幫我收衫，好乖啊！佢每收一件，我就同佢講一次吾該，佢又答番我一句吾該，然後好開心咁更加落力收衫。其實之前佢試過好多次，不過仲細做吾到，今晚第一次成功，見佢個樣覺得自己好叻咁，好得意呀！哈哈！

睇過d文章講吾好怕小朋友吾識，會越幫越忙而吾俾佢嘗試，應該俾d鼓勵佢，令佢有自信心去學習新事物。等佢試多d，學多d，大個之後個人可以自信d，獨立d。

我而家好多時都係從旁觀察先，睇佢做吾做到，做到就讚，吾識就教，教左好多次都吾識就會笑下佢，但係如果做吾到係度發脾氣的話就會鬧！呢個情況媽媽細個時經常發生，因為面口吾好，成日俾大人鬧！你話我細個時幾蠢呢！阿女你千析吾好似我呀！

2歲生日禮物 I

囡囡仲未生日, 已經收到生日禮物喇!

姨姨送既單車~ 不過囡囡而家剩係識坐,
只係踩到一下, 慢慢學啦!

Kitty電腦~

積木車車~

成日拖住佢行黎行去~

海綿寶寶大畫簿一本, 真係好大本~



仲有叔叔送既thomas聲控砵砵車,
好得意呀!

多謝哂大家! 囡囡玩得好開心~

吾識玩! 發炆憎!

試完又試, 都玩吾到, 最終囡囡發炆憎! 吾玩!

呢個女越大越吾乖, 開始會發埋d小姐脾氣,
真係要好好教導下!

人地話小朋友2歲-3歲好麻煩, 好啱呀!

佢識d吾識d, 做錯又吾知,
叫佢吾好做, 佢偏要係你面前做多次!
鬧佢就剩係喊, 以為咁我地就會吾鬧!

今晚呢位大小姐又不停扭計,
係咁挑戰我EQ, 最後俾我打獲甘,
仲要吾睬佢, 等佢講對吾住先理番佢!
之後成晚乖哂!

真係好吾想成日發火, 不過無辦法,
好聲好氣同佢講道理, 佢完全聽吾到,
係要鬧先識驚, 唯有鬧完先再同佢講道理啦!

我一定吾可以龐壞佢! 由細就要教好!

2nd Birthday Party @ DC

囡囡第一個生日party

一去到就驚, 仲要驚到喊,
吾知係因為吾夠瞓定點...
一定要痴住我或者爸爸...=.="

見到蛋糕都吾笑...
其實佢好期待個蛋糕架,
去之前仲係咁講"kitty蛋糕"...

好彩食完蛋糕之後, 終於笑番, 安樂哂!!

同d姐姐玩得好開心~~

心情靚哂既囡囡仲會擺下pose,
娛樂下大家, 哈哈!!

我真係好想多謝你地既安排, 好感動!
囡囡玩得好開心, 多謝你地咁鍚阿女呀!

傷風膏

阿女又有鼻水喇！一轉天氣佢就會咁，次次傷風佢都要好耐先會完全好番。好彩今次無發燒，仲食得玩得，係成日有鼻水流落黎，做左鼻涕妹囉！

記得佢上次又係流鼻水，仲要一瞓覺就鼻涕倒流咳醒，完全瞓吾到，好慘！見佢咁辛苦，但係又幫佢吾到，好無耐...

幸好俾我上網睇到人地話用傷風膏搽腳底，之後同佢著襪可以止咳。初時爸爸仲話好無聊，信吾過！但係我就覺得試下無坊，點知真係work架喎！囡囡成晚無咳，有覺好瞓！我而家剩係同佢搽熱腳底，吾著襪都ok!

希望囡囡快d好番啦！就快2歲生日，有好多節目要慶祝架麻！

惱惱

囡囡惱媽媽掛住上網, 吾同佢玩,
要我熄機, 我吾肯, 睇下佢個樣幾惱!!

吾好意思, 見到咁既樣我即刻忍吾住笑,
點解阿女惱個樣咁似我既??

我越笑, 阿女越惱, 表情又誇張左...
囡囡, 吾得喇! 一睇就知你扮野啦!

屋企玩水水

夏天又到, 最好既消暑方法緊係玩水啦!
住村屋有樣好, 係屋企都可以玩到水~

上年夏天, 著住連身泳衣既囡囡玩得好開心~

一年後
換左bikini既囡囡一樣玩得勁開心~

仲笑到見牙吾見眼添!

咁鍾意玩水,
吾知囡囡大個識吾識游水呢?

自彈自唱

囡囡睇到電視個姐姐自彈自唱,
即刻學, 不過佢係唱abc囉!!



阿女一直都好鍾意睇音樂節目,
而家仲會學埋d歌星唱歌跳舞, 老積到爆呀!
不過佢吾係個個歌星都鍾意,
有時佢會講「哇! 好難聽呀! 吾睇喇!」
哈哈~

跳下舞先

今晚電視做廣告頒獎節目, 阿女好鍾意d廣告歌,
睇到好high, 係咁跳舞~



覺吾覺佢d舞步好老積呀?



仲要揸住個咪扮唱歌, 好好笑!

湯麥士

一直以黎，囡囡睇電視都好揀擇，
雖然佢成日話"哈片好睇"不過佢吾係套套卡通片都睇架，
近來佢剩係鍾意睇Thomas，
嫲嫲話一直追開Thomas卡通既囡囡,
因為電視已經播完, 佢好吾開心, 仲喊到好慘添!

呢架火車既影響力真係好大...
去到書局佢一見到Thomas d 書就會失控，
係咁話火車呀! 俾錢錢喇!
見到地鐵會大叫火車!
出街見到輕鐵仲會大叫湯麥士呀!
夜晚放工一見到我吾會叫我媽媽，剩係叫火車呀!
因為佢想拎部ipod玩Thomas game!
而我就有被收數既感覺...

見佢咁鍾意，諗住買Thomas玩具俾佢啦，
好奇怪，次次佢都話吾要！
吾知佢係未剩係鍾意電視同書裡面既Thomas呢?

生日歌

囡囡就快生日, 而家日日都會同佢唱生日歌,
希望到佢生日果日會識唱啦!



之前佢剩係識唱"Happy...to you",
無左birthday...



呢兩日終於識唱埋birthday喇!!
有時佢會自己對住d公仔唱,
仲要個公仔跳舞, 好好笑!

今年plan左好多節目, 好期待呀!!

p.s.條片有埋我把聲, 因為我吾唱佢就吾肯唱...
要大家既耳仔受罪, 吾好意思

肥妹

今晚同個女用wii磅重，而家重16.2kg, 原來佢呢半年只係重左2.2kg， 但係點解好似重左好多咁既？ 抱一陣都已經好攰，其實會吾會係我又老左呢！

磅完一齊打機做下運動先，同佢玩打拳，玩左半個鐘，阿女竟然話攰吾玩，佢都係肥妹一名黎架喇！玩都懶既，同爸爸一樣....

我地而家一叫佢做肥妹，佢次次都好開心咁show個肚腩俾我地睇！係咁講肥妹呀！

算啦！其實我地兩公婆都係肥底，個女又點會瘦吖！而家連腳厚都似足哂我地，買鞋既選擇又少好多喇！

不過最緊要都係個女健康，開心，身型既問題無所謂啦！同佢做多d運動先！

First Gift

第一次收到囡囡送俾我既母親節禮物,
好開心呀!

囡囡同我講張卡好靚架!

d英文姨姨話係miss捉住佢隻手寫既,
仲有囡囡既大手仔~

雖然囡囡仲未知咩係母親節,
但係吾知點解我見到張卡個心都好甜,
要儲起佢先~

超級無敵估歌仔

囡囡聽住headphone唱歌仔,
唱到d音錯錯地, 真係好好笑~



知吾知佢唱緊咩歌呢?

認字母

發現囡囡識得哂A-Z喇! 叻叻喎!
吾知係未聽得ABC歌多,
定係日日玩abc既玩具識既呢?





我得一次成功問得哂佢A-Z咋,
問多次佢已經專心吾到喇!

Kitty動物園

之前既勞作仔

終於完成喇!!

好多動物...

仲有Kitty家族...
多到草地都吾夠位擺!

睇下囡囡既反應~
( 係我叫佢扮既, d戲假左d囉! 哈哈! )

玩呢個動物園好有難度,
不能放太多動物...不能大力...
不能有風...不能大動作...

反而得閒拎幾隻動物出黎教囡囡, 仲好玩~
佢次次見到D動物都會講:
「哇! 好多呀!」
「兔兔! 好得意!」
「Kitty! 好得意呀!」

跑! 跑! 跑!

囡囡近來發福左好多, 日日都好似生積咁!
係咁食.. 係咁食..
都係同佢去跑下先, 又係吾肯跑草地,
跑跑下走左去側邊條石屎路度, 反而係咁來回跑喎!!

我好鍾意呢幾張相, 阿女由遠處跑埋黎攬住我,
吾知點解, 我覺得呢種感覺好溫馨呀~

媽媽...

我黎喇!!

跑呀!

跑呀!

哈哈~~