I love 囡囡

有日我放工之後好攰, 吾想講野, 瞓左係度睇電視既時候, 囡囡見我咁, 問: 媽媽你吾開心呀?
我: 吾係呀!
囡囡: 你一定係吾開心啦! 你次次吾開心先吾講野既!
我: 哈哈! 你又幾了解我喎!
囡囡: 緊係啦！你吾開心呢，就吾講野！你開心呢，就會講好多野！
爸爸: 咁你氹番媽媽開心啦!
囡囡: 佢吾係吾開心呀! 佢眼瞓咋! 瞓醒就無事架喇!
全家一齊笑左!

估吾到三歲既囡囡竟然咁清楚我! 真係心都甜哂!
我慶幸上天送左呢份咁珍貴既禮物給我! 我地以後大家一齊開心，一齊講好多野啦！

MaMa手作仔 [3]

做公仔已經成為我每晚既娛樂, 囡囡一瞓著就開工,
吾覺吾覺, 又整左幾隻!

3歲既囡囡公仔

朱古力狗狗

心心人, 囡囡叫佢做"I Love You"

仲有小企鵝仔!

囡囡而家好有性格, 吾係隻隻公仔都肯影,
要佢鍾意再加心情好先得, 呢位私家model越黎越難控制喇!

結婚？

近來阿女成日講, 媽媽我結婚喇!
我問: 同邊個?
囡囡: 同學A
我: 女仔黎架喎?
囡囡: 吓! 咁同學b啦!
我: 點解要同佢結婚?
囡囡: 因為我想結婚囉! 人人都要結婚啦! 同爸爸, 媽媽一齊結婚...

今日仲加埋話要拍拖!
我: 囡囡你記住十八歲先準拍拖, 三十歲先好結婚! 而家就可以識好多朋友仔, 知吾知道?
囡囡: 知道

哈哈! 我都知你吾會明白我講緊咩! 其實拍拖同結婚你都未知點解, 只係吾知係邊度學左, 可能電視又或者係卡通片, 而家d小朋友真早熟! =.="

仲好老積添呀！

搭西鐵

因為怕左阿女搭巴士暈車浪又嘔, 近來我地出街都搭西鐵, 囡囡次次一入去就會話無位坐既, 好攰呀我! 有時仲會想我抱, 好彩既時候會有d叔叔(只有係中年男人)肯讓坐, 有時都覺得吾係幾好意思! 好似逼人起身咁!

不過都吾係次次都咁好彩, 算啦! 香港係咁架喇! d優先坐係俾d行得快既人優先坐, 有幾多時候真係會俾有需要既人坐架! 係呢方面台灣同日本既教育就好好多喇!

回程就可以搭番巴士俾囡囡charge下電, 如果要我抱住瞓著既佢搭西鐵, 係咁轉車, 諗起都驚!

阿女你快d吾暈車浪啦! 我吾想再要揹住成身嘔味咁行街又或者無端端要破財買衫呀!

仲有記住呢架係港鐵，吾係輕鐵呀！

雙子囡囡

爸爸: 囡囡你最錫邊個?
囡囡: 最錫爸爸
媽媽: 咁我呢?
囡囡: 最錫媽媽
爸爸: 咁即係邊個先?
囡囡指住爸爸: 最錫爸爸
再望住我: 最錫媽媽

囡囡有日發脾氣怪我吾同佢玩: 我而家吾開心呀! 我以後吾同你玩喇! 吾同你去街呀!
我笑住答: 好野! 都好喎!
囡囡即刻由惱變笑話: 吾係, 我講下笑啫!

又有次囡囡又惱, 走左去廚房自閉既時候, 我: 好肚餓! 爸爸不如食片片啦!
囡囡即刻衝出黎: 好呀! 我又食!
我: 你吾係惱咩?
囡囡: 我飲水水咋麻! 媽媽食片片啦!

有日媽媽心情吾好!
爸爸: 媽媽吾開心, 你氹番佢開心啦!
囡囡: 媽媽吾係吾開心, 佢眼瞓咋! 瞓醒就無事架喇!

囡囡皮膚吾好, 同佢搽藥膏既時候, 我諗我個樣好嚴肅...
囡囡問我:媽媽你吾開心呀? 
我: 媽媽吾係吾開心, 係擔心。
囡囡: 我而家吾痕喇! 我會好快好返, 你吾好擔心啦!

曾經聽聞雙子座既小朋友好識講野，原來係真既，囡囡心情好既時候把口真係好得，氹到我地好開心！其實都吾知佢學邊個，全家大人講野都直腸直肚，可能真係天生！

不過到佢扭計同玩固執既時候，我地就頭都痛埋！

我都係鍾意開心既囡囡，阿女你扭少d計啦！