畫一字

囡囡今日寫一字

似模似樣! 令我好驚訝!

仲要一路寫一路講: 畫一棟...畫一棟...就係咁喇!


而家d書真係好, 寫完可以抹乾淨, 咁就可以慢慢玩啦!

佢剩識畫一字, 其它都係抽象派,
仲話: 吾識畫呢! 就係媽媽畫喇!
哈哈~

第二次做花女

媽媽既好朋友結婚, 囡囡有幸再做花女~

見佢平時咁驚男人, 所以早左去現場俾佢warm up下!
點知今次佢又無咩點驚, 仲玩得好開心添!

周圍攪d佈置, 囡囡話呢個好靚!

仲係小戲院入面跑黎跑去, 係咁玩張櫈...
哈哈! 同我細個時一樣!

好彩今次有多位花女陪囡囡, 佢兩個一見如故,
成日拖住手仔周圍走~

正式出場, 佢地表現得非常好, 係有小小驚,
呆呆地就乖乖咁行完, 叻呀!

行完佢吾捨得返埋位坐,
係咁話: 我要做花女呀!
媽媽: 做完架喇!
囡囡好大聲: 都未做!
媽媽: 吾好咁大聲, 一齊睇姐姐簽名啦!
囡囡: 我都未簽...
媽媽: 你千析吾好咁快簽呀!

可能玩得太耐, 呢晚佢攰到無咩胃口食野,
見佢開始想發癲, 都係早d走好d!

臨走前佢仲惱惱地問: 又話去馬場, 點解都見吾到馬既?

估吾到, 咁快我就開始吾識答阿女既問題喇! 哈哈~

大梅沙華僑城之旅

好耐無同屋企人去旅行喇! 好想出外散散心,
近近地去左深圳大梅沙同埋華僑城玩.

揀左間露台有浴缸既酒店住, 希望可以對住個海浸浴, 好爽咁!
不過間酒店就殘左d, 除左個浴缸同埋露台個view幾靚之外,
其他都殘殘地, 下次都係搵間新d靚d既酒店住先得!

今次大梅沙呢個地方俾到驚喜我, 地方乾淨,
周圍都有好靚既酒店同埋住宅, 加上天晴,
又對住個大海, 好有渡假feel呀!

坐係露台吹下海風, 睇下風景, 真係好舒服!
好耐無試過有呢種感覺喇!

加上今次有姨媽同姨姨, 囡囡係佢地面前從來吾敢扭計, 仲好痴佢地添!
咁我就更加多機會可以輕輕鬆鬆睇下風景, 影下相, 都係好耐無試過喇!

~ 第一日 ~

食完五谷芳乳鴿, 就周圍行下, 竟然見到有個新outlet開左,
好多名牌, d舖頭仲同香港既名店一樣, 好驚訝!

之後去左有27層樓高願望塔, 上到去可以睇哂成個大梅沙,
d屋好靚, 酒店好靚! 不過搭Lift上去既時候, 我就有d驚囉...hehe

囡囡開始吾耐煩, 因為由食飯開始已經同佢講一陣去沙灘玩,
點知去左咁多地方都未到沙灘, 個人又開始攰...
好彩隔離就係沙灘! 睇下囡囡玩得幾開心~

表姐仲買左個風箏, 雖然放極都放吾起,
不過大家一齊跑下笑下, 好relax, 好開心!

諗住去買水飲, 遠望見到呢d企鵝, 以為食得,
點知一行埋去竟然係買龜仔, 即時嚇一嚇!
估吾到買飲品既地方竟然會有龜買,
囡囡見到都話好驚...哈哈

晚餐去左天濤軒, 門面非常高級,
初時我地都驚會好貴, 好彩表姐堅持要去睇下個menu先,
如果吾係我地就食吾到咁好味既晚餐喇!


樣樣都好好味, 尤其係入口即溶既東波肉同埋臘味煲仔飯,
到而家我仲回味緊, 加上服務態度好,
同埋價錢只係同香港茶餐廰差吾好, 好抵呀!

~ 第二日 ~

飲完茶就出發去華僑地, 今次我地剩係去茶溪谷,
去到見到一片花田, 好靚呀! 不過囡囡佢地不停話有蚊咬,
企左係側邊係咁搽油, 得番我同表姐兩個係咁影影影!
仲諗住同阿女影花花寫真架麻!

華僑城真係好大, 好彩果度有車搭, 如果吾係我地一定行吾哂,
不過我地都吾夠時間可以度度停同慢慢睇,
之後係古裝街食左一陣野, 行下吊橋...
原本想係古堡果邊嘆杯coffee, 睇下d真人扮銅像,
不過去到已經好晏收左門lu...

地方都幾靚, 仲有好多新人係度影婚紗照,
如果下次再黎, 一定要早d去到先得!

其實而家去旅行, 一日吾可以去太多地方,
小朋友頂吾住, 連大人都會攰得好快~
佢一個吾開心要抱, 真係抱到手斷佢都吾肯落地!
到時一哭二鬧三扭計, 又會攪到無哂mood, 俾佢玩謝呀!

所以今次真係好多謝姨媽同姨姨對囡囡既悉心照顧!
仲有表姐成日攪笑~ 全靠你地, 今個旅程先會咁開心!

希望快d可以再一齊去旅行!
下次希望可以搭飛機啦!

媽媽生日

今年生日, 雖然囡囡病了, 吾可以去街慶祝...
不過可以聽到囡囡同爸爸唱生日歌俾我聽~



真係覺得好開心!

囡囡仲好緊張我會吹熄支爉燭, 要吹得快過我添! 好好笑!
希望將來可以煩惱盡消~
健健康康~ 開開心心~

Toy story

近來囡囡中左電影Toy Story毒,
日日都要睇番幾次至開心,
巴斯光年同胡迪已經入哂腦,
仲可以講埋d劇情俾我知!


啱啱出埋第三集, 又可以loop住咁睇喇!

囡囡今日睇緊Toy Story時話:
不如買巴斯光年玩具返黎一齊一飛沖天啦!
媽媽: 一齊睇開心d呀?
囡囡: 係呀!
媽媽: 一陣睇醫生你吾扭計, 乖就買啦!
點知佢真係無扭計, 仲無喊添!

諗住去書局買本Toy Story書俾佢算啦!
點知佢睇都吾睇就話:
吾要巴斯光年書, 要巴斯光年玩具呀!
哈哈! 真醒目!

最終買左...好貴...好肉痛...
好耐無試過買咁貴既玩具喇!


返到屋企好開心既囡囡,
仲同佢地傾左好耐計...

不過之後囡囡話:
無牛女既? 無狗狗既? 無豬豬既?

囡囡你吾係想要哂入面d玩哇! 好貴架!

星星歌

終於吾再剩係唱abc歌喇, 新加Twinkle, Twinkle Little Star,
雖然加埋結他彈奏, 不過露左個肚腩仔, 扣左d分...哈哈

估佢吾到

媽媽望住塊鏡: 媽媽老喇!
痾緊豬豬既囡囡: 吓! 你老喇! 我吾同你玩喇!
媽媽: T_T

當囡囡又想走去攪個抽濕機既時候
媽媽: 你吾好攪啦! 
囡囡: 我幫你珊門啫!
媽媽: 吾該哂! (不過心諗擺明想玩啦! 仲答到咁寸) ...=.=

囡囡趁我行開左飲哂我杯奶昔...
我: 你飲哂咁我飲咩呀? 
囡囡: 你飲水水囉!
我: >.<

一齊食緊豆腐花既時候...
囡囡好sweet咁講: 媽媽! 我想問下你呢?
媽媽好期待咁問: 咩事呢?
囡囡: 呢個咩黎架?
媽媽好失望咁答: 豆腐花...
囡囡: 咁呢個呢?
媽媽: 碗...
囡囡: 咁呢個呢?
媽媽: 你話呢?
囡囡: 豆腐花囉! 呢個呢係碗.. 咁呢個呢就係蓋....就係咁囉!
媽媽: =.="

囡囡既反應有時真係估佢吾到, 攪到我都吾知好笑定好惱！哈哈！

做家務

囡囡你今日玩左咩?
囡囡諗一諗, 好興奮咁講: 吸塵...拖地...
媽媽: 哇哈哈! 咁乖呀!
囡囡: 係呀! hehe

囡囡真係好忙架!

一瞓醒就要吸塵~

夜晚又要拖地~

做完家務, 緊係要搽下cream先啦!

屋企突然多左個兒童家務助理喎!!哈哈

囡囡緊係平時見到我做家務, 有樣學樣啦!

其實佢仲會幫我掛衫, 收衫~
玩緊水既時候又同我講: 媽媽我大個女識自己洗碗喇! 我好叻呀!
希望囡囡大個真係會咁乖幫我做家務啦!

傾計

每晚回家都會問下囡囡今日開心嗎?
返學學左d咩? 玩左d咩呀?


點解次次都剩係得"abc歌"既! 我知你仲有學其他野架喎!
最叻就係講哂同學仔d名, 同埋邊個小朋友喊! 邊個小朋友曵!
玩過咩就吾記得, 呢d就記得咁清楚!
仲好似厭我煩, 吾想答咁添...=.="

見佢吾想答, 問下第二d野先!


原來係囡囡眼中人人都靚架, 做小朋友真係好呀!

不過...問多兩問...
佢又吾想答我喇...>.<

影相表情

近來同囡囡影相, 佢都會整呢個表情...次次影完都要即刻睇番, 仲好開心話咁樣好靚呀!

對眼變左一條線, 咁樣靚咩?

其實囡囡你係未學緊媽媽呀？
媽媽對眼成日都係一條線架喎...=.="