唯一

影燈飾真係好難, 今年x"mas唯一一張滿意既囡囡相,
不過就食緊奶咀, 下年一定要加油, 影好d~

聖誕相...

諗住同囡囡影下聖誕相, 點知囡囡剩係玩草, 無理過我...
今年既燈飾真係麻麻, 囡囡又瞓左覺豬, 攪到我地都無乜興趣再影落去, 希望下年會靚d啦~

X'Mas囡囡

2008囡囡既聖誕look~


Wishing all have a Happy Christmas!!

冼爸爸的歌聲

冼爸爸唱 :「爸爸愛囡囡, 囡囡愛爸爸....啦~啦~啦~啦~啦~」

囡囡既表情係.......
冼爸爸 :「做咩呀, 好難聽咩?」

冼媽媽即時笑死左~

Princess Chair

Betty姨姨送左張Princess Chair俾囡囡, 囡囡好鍾意喎~

不過.......

完全無Princess既感覺~~哈哈

處女下水禮

我地今日買左嬰兒泳池套裝同囡囡係屋企天台游水

囡囡一落水, 初時都驚驚地...

5分鐘之後就越玩越開心喇~

囡囡吾怕水令我覺得好開心, 我最鍾意既運動就係游水,
"囡囡等你大個, 媽媽教你游水, 好吾好?"

2個半月的芯彥

囡囡2個半月就已經好鍾意企, 只要將佢企係度, 就會笑得好開心,
人人都話佢好快會識行, 不過聽聞BB太早識得行, 將來會辛苦命架喎!!


咁囡囡你企下好喇, 吾駛急, 將來有排你行

囡囡D頭髮點解.....

洗爸爸近日常問冼媽媽:「點解囡囡個頭咁臭既?」
係喎, 真係幾臭, 仲有頭皮添, 吾通呢D竟係頭泥
可能囡囡聽得多, 佢越黎越吾鍾意我地攪佢D頭髮,

無論係洗頭

定梳頭

佢都會喊到拆天.......
係喇, 係喇, 囡囡吾臭, 最香係你, 俾我幫你梳頭啦, 好吾好?

買左新相機

其實囡囡成日笑, 不過我就影吾到, 用傻瓜機影囡囡真係要睇彩數
諗左好耐, 決定去買Canon 450D, 終於影到囡囡笑喇
真係幾貴都抵呀~

新床仔

吾知點解囡囡總係吾鍾意瞓在客廳的網床, 一瞓就喊,
今日買左張新搖床仔, 佢好鍾意, 希望佢朝早可以瞓得好d,
咁我就可以放心返工~

囡囡的哭聲

睇書話媽媽會分得出bb哭聲既原因, 初時我都半信半疑,
今天我也可以從哭聲分得出囡囡既要求, 不再徬徨, 好有滿足感

"我要做好呢份工" ~~哈哈~~

芯彥滿月

今日芯彥滿月, 同佢著左件新衫出街食飯慶祝,
不過佢塊面仔好多紅粒, 見到都心痛, 希望佢快d好番啦~

囡囡的睡姿

囡囡一向都鍾意大字型瞓, 姨媽話咁樣瞓代表佢有安全感~


不過佢今日既睡姿好似打功夫咁, 笑死我~

樹熊公仔

呢隻樹熊公仔陪我過左好多個長夜, 或者佢充滿左我既體味,
令到傻瓜囡囡以為佢就係媽媽, 而家樹熊公仔好忙,
日頭要陪囡囡, 夜晚要陪番媽媽~

以為我仲抱緊佢, 所以笑得咁開心~

佢地好friend呀~

芯彥今日12朝喇~~

芯彥呀!! 點解你隻眼咁細既? (似我?)
點解你咁燥既? (又似我?)
點解你吾怕水既 (都似我?)
點解你咁得意既 (咁一定似我啦!! 哈哈)
你今日滿十二朝喇, 好快就滿月, 1歲, 2歲...
記住要對眼大返d, 要開心d, 要健康d, 要乖d…
仲有媽媽就要瘦返d…
爸爸就要搵多d…

囡囡終於出世喇!!

由於囡囡點都吾肯出黎, 最終要係5月29日一早8:00入院催生

10:00am 穿水, 落催生藥, 就開始等陣痛, 當時心情好緊張, 心諗陣痛究竟會幾痛呢!!

12:00pm D陣痛開始勁左, 不過仲忍到, 心諗再痛d都得~~

4:00pm 開始越黎痛, 而隔離床一齊等生女人既亦都一個個推左出去, 我開始心急, 問d姑娘仲要等幾耐, 不過佢地幫我check完之後個樣話俾我知, 等下啦你~~

6:30pm 探病時間到, d陣痛每10分有3次, 每次都令到我有想死感覺, 諗起今日見吾到老公已經有d想喊, 而我之前亦打左電話叫佢吾好趕黎醫院, 我仲有排先生得, 心情真係好down, 突然姑娘走入黎俾個電話我, 話我老公搵我, 我一聽到佢把聲, d情緒就開始失控, 喊住咁同佢講, 好痛呀, 吾知幾時先生得呀, 你地返去先啦, 我ok架喇!!

8:30pm 痛到頂吾順要聞笑氣, 係d forum度話聞笑氣都止到痛, 但係我覺得一d痛都止吾到, 純粹係係你痛既時侯俾d野你做下, 等你分下心~~

10:30pm 已經痛到想死, 亦都完全無信心可以生得出阿囡, 因為已經吾可以再接受到升級既痛, 好想開刀, 問姑娘佢地話未得住, 要等醫生, 好吾開心, 突然姑娘又俾個電話叫我打俾老公, 我話佢返左屋企啦, 根住d姑娘話吾係呀, 佢係出面等緊我, 果刻真係覺得開心, 即刻打俾佢, 一聽佢把聲, 我d眼淚就係咁流, 係咁喊住講好痛, 話好想做手術, 但係佢地要我等.......收左線之後我就開始係咁投訴d姑娘, 俾佢地話我好似小朋友扭計咁......我都吾想架

11:00pm 隔離床個女人推左入手術室, 咁我呢, 仲要等到幾時, 心諗變態架, 明知人地開吾到, 仲乜仲要我痛咁耐, 早知去私家生啦......

11:30pm 醫生終於黎喇, 我終於可以開刀喇, 可以吾駛再痛喇, 跟住醫生同我講咩, 我係咁話是但啦, 快d啦, 吾聽喇~~ 之後半身麻醉, 成個人舒服哂, 而囡囡亦都好快係5月30號零晨出世喇~~

40週 過期居留

阿囡係媽媽個肚度好食好住, 吾願出黎呀~~
而家唯有等5月29號催生啦, 媽媽同爸爸都ready好哂, 等阿囡咋!
吾知囡囡會有幾重呢? 又係咩樣既呢? 媽媽一諗起你就覺得開心~~
囡囡記住要健健康康,快高長大, 開開心心呀, 爸爸媽媽等住見你~~

38週 仲等緊

已經放左2個星期產假, 真係覺得好悶喇!!
而家我又乜都吾耐得, 坐吾得耐, 企吾得耐, 行吾得遠....成個人輪輪盡盡咁
阿囡你快d出世啦, 我等你等到好苦喇~~

36週 等待中

今日去左檢查,
醫生話BB約有5.28磅,
咁睇怕阿囡都要住多陣先好出黎喇,
好啦, 你住多2個禮拜好喇, 爸爸媽媽等住見你呀~~