呵..呵..媽媽

媽媽近來整親手指, 反左半隻指甲,
做家務既時候好易會撞到好痛!

囡囡見到:「媽媽, 好痛呀?」
媽媽:「係呀...」
囡囡捉住我隻手:「呵...呵...」
仲會吹吹我個傷口:「吾痛呀?」
媽媽:「吾痛喇! 多謝哂你呀!」
囡囡好滿足好甜咁對住我笑~

好奇怪, 真係即刻吾痛架!
仲覺得好甜添!

火車頭@黃金海岸

同囡囡去黃金海岸睇佢鍾意既Thomas火車頭~

一去到就好開心, 係咁同我講湯麥士呀! 湯麥士呀!

不過同佢影相, 佢成日話要企係前面摭住Thomas喎!

又摭住喇!

影左一陣, 忍吾住要跑喇!

係咁跑, 亂咁跑, High左~

諗住同囡囡出去坐火車, 點知今日太熱,
仲要無風, 囡囡熱到樣都變埋...

企一陣囡囡已經成頭濕哂, 都係飲下野好d~

無火車坐, 轉去室內坐咸蛋超人啦!

一樣玩得好開心~ 仲玩到吾願走添!

小小佈景, 幾個紙版,
簡簡單單, 咁就玩左一個下午^^

第一次睇戲

今晚終於帶左囡囡睇Toy Story3電影喇!
第一次入戲院, 囡囡好興奮咁衝入去, 爸爸買左爆谷俾佢食,
試左一粒之後話:呢樣未食過呀! 哈哈~ 又真係第一次食喎!

囡囡好叻, 坐定定睇足全場, 無扭計, 無落地, 又無大聲講野...
點解囡囡咁乖? 緊係因為有野食啦, 爆谷, 薯條加一支保礦力,
慢慢食, 食到散場...

返到屋企
媽媽 : Toy Story好吾好睇呀?
囡囡 : 吾好, 好悶呀!
媽媽 : 好悶?
囡囡 : 係呀! 卡通片好耐, 好悶呀!
媽媽 : 哈哈! 咁仲鍾吾鍾意巴斯光年呀?
囡囡 : 鍾意呀! 飛呀...好攪笑!
媽媽 : 咁下次仲睇吾睇戲呀?
囡囡 : 睇呀!
媽媽 : 點解呀? 好悶喎!
囡囡 : 吾悶...攪錯...
媽媽 : 你想食野咋麻?
囡囡 : 係呀! 薯條好味呀!
媽媽 : @.@

短髮look

原本想同囡囡流長頭髮,
不過當我見到佢d頭髮越長越亂,
又吾肯扎辮, 出街成隻濕水雞咁, 見到佢都辛苦呀!

叫左爸爸好耐, 終於批准囡囡剪短d頭髮,
今次叔叔出手, 剪得好靚呀!

短髮既囡囡
感覺清爽左...

整齊左...

望落仲醒目左好多添~

終於明白點解我細個既時候未試過長頭髮喇!
~哈哈~

跳勁舞

囡囡要我彈結他, 佢要跳勁舞喎!
彈到咁快, 彈到我手軟呀!



跳完舞就玩推櫈仔, 仲推到好high添!

睇戲

近排套Toy Story3電影上畫，囡囡次次見到廣告都會話我想睇呀！
媽媽：你真係好想睇？
囡囡：係呀！
媽媽：睇戲吾準出聲架喎！你得咩？
囡囡：好哇！
媽媽：要睇成個鐘架喎！
囡囡：嗯....
媽媽：成個鐘都要坐係度吾準落地架喎！
囡囡好驚咁講：吓...

囡囡，都係大個d先帶你去戲院啦！
吾係一陣戲又睇吾到，仲要喊住走，或者要係戲院入面捉你，咁就吾好啦！

一支?兩支?

囡囡今晚悶悶地都又想食多支奶奶...
媽媽 : 食飽就夠喇! 吾好係咁食呀! 好肥架! 每晚只可以食一支奶奶!
囡囡 : 兩支奶奶?
媽媽 : 吾得, 太肥喇!
囡囡 : 兩支奶奶吾得, 太肥喇! 一支奶奶得, 吾肥喇!
媽媽 : 啱喇!
囡囡 : 兩支奶奶得, 吾肥! 一支奶奶吾得, 太肥喇!
媽媽 : 吾係! 一支奶奶先得...
囡囡 : 係啦! 一支奶奶先得呀, 傻賭仔!
囡囡繼續 : 一支得...兩支吾得...一支吾得...兩支得...
媽媽 : 你講緊咩呀?
囡囡 : 吓...吾知道喇! 哈哈
媽媽 : 哈哈哈

隔左一陣
囡囡 : 媽媽, 我好肚餓喎!
媽媽 : 咁瞓覺豬啦! 瞓左就吾肚餓架喇!
囡囡 : 吓....

其實囡囡係假肚餓, 佢成日係瞓覺之前要求呢樣要求果樣, 務求可以遲d先瞓覺豬!

學唐詩

囡囡係學前班學左唐詩
學左半年, 而家已經識得背

~ 靜夜思 ~
床前明月光,疑是地上霜。
舉頭望明月,低頭思故鄉。



近排佢又學緊一首新詩

~ 回鄉偶書 ~
少少離家老大回,鄉音無改鬢毛催;
兒童相見不相識,笑問客從何處來?



之前我都吾知佢講緊咩少少離家,
今日姨姨買左唐詩背字卡俾佢,
終於可以同佢一齊學喇!

講真我細個既時候,
好似都無背過唐詩300首喎!

有隻雀仔跌落水

呢首好易上口, 囡囡聽左幾次已經識得唱,
最鐘意係咁唱跌落水,跌落水!!

今晚...

囡囡見我收緊衫，走埋黎問：「乾哂喇？」
媽媽：「係呀！」
然後佢就同平時一樣同我一齊收衫，而家佢已經好熟手架喇！
囡囡：「媽媽，兩件...」
媽媽：「吾該哂！」
囡囡：「吾該...hehe！」
囡囡：「爸爸既...」
媽媽：「係呀！爸爸架！」
囡囡：「無哂喇！」
媽媽：「攪掂！吾該哂呀！」
囡囡走入房同爸爸講：「爸爸，衫衫呀！」即係佢收左衫，想人讚下^^

今晚佢原本想搣我膊頭，點知我話好舒服呀！
囡囡好奇怪：「好舒服？？」
媽媽：「係呀！再整吖！」
囡囡：「好哇！....舒吾舒服呀」
媽媽：「好舒服呀！」
囡囡好開心：「哈哈！搣搣好舒服...」
媽媽：「呢d叫做按摩」
囡囡：「吓....」

我慶幸....我有個女兒。

囡囡與保礦力

七一好好天, 同囡囡去左沙灘玩~
可能天氣太熱, 囡囡好似鍾意飲野多過玩...

囡囡:「媽媽, 好味呀!」
媽媽:「吾好飲哂呀! 留番d俾我!」

囡囡:「咦...仲有呀!」

囡囡:「正呀!」
媽媽:「飲哂喇你!」

囡囡:「仲有...仲未飲完呀! 小姐...」
媽媽:「@.@」

囡囡扮傻:「飲哂喇! 無喇!」
媽媽:「都話你實飲哂架啦!」
囡囡拍拍我:「吾緊要啦!」
媽媽:「=.="」

扎辮仔

天氣好熱,
囡囡d頭髮成日都好似洗完頭咁, 吾識乾!

想同佢扎辮, 呢位大小姐又吾鐘意, 就算同佢紮好,
一陣佢就會自己拆左...

嫲嫲或者姨姨同佢扎會好d, keep耐小小,
而我之前直情未掂佢個頭, 佢已經咦哇鬼叫喇!
乜我手勢好差咩...=.="

同佢講扎辮辮靚靚呀!
佢就會答吾要...吾靚呀! 扎辮辮好核凸呀!

今日囡囡心情好, 終於肯俾我扎辮仔喇!
原本想同佢扎日本妹個d髻仔架, 型d麻!
不過佢d頭髮未夠長, 同佢再流長d先^^

囡囡又突然大個左好多,
呢張相好似幾歲既小朋友咁呀!

學大人

囡囡好鍾意聽大人傾計, 仲學埋大人講野,
不過就好既吾學, 衰既學哂...

佢整污漕d野, 就同我講無所謂啦!
整爛左野, 就會話吾緊要啦!

仲有黐線...攪錯...成日失驚無神講...唉...



係咁講黐線, 仲以為好好玩, 要睥佢一陣先吾講...

已經話過佢, 不過都無用, 因為我發現,
大人好多時都有講黐線同埋攪錯...
囡囡吾明白呢d說話小朋友係吾應該講既,
同埋好似越叫佢吾好講, 佢就越講得多,
可能呢d係人既天性, 都係慢慢教啦!!

自彈自唱

彈住結他唱歌既囡囡, 似吾似民歌歌手呀? 哈哈